ديــرة العز..~

(((ديـــــرة الــعـــز )))





يا ديرة العز والامجـاد ماجـوره



محـد يدنـس ثـراك الا يدنسنـا



حنا ترى كلبونا جيش اخو نـوره



ان ما حميناك ما نزهـا ملابسنـا



عداك في ساحة الميدان مدحـوره



مثل الافاعي عليها بالقـدم دسنـا



ماهي حكي كلها بالصوت والصوره



حنا على كسـرة الاعـدا تمرسنـا



بيارقك في جبل دخـان منشـوره



لك نرخص عيالنا ونقـدم انفسنـا



لو دارت افلاكهم معنـا ميـة دوره



حنا سـواة الصـوارم لا تنكسنـا



اعداك ما دامها ماهيـب مقبـوره



ما نشرب الكيف لا صكت مجالسنا



الحوثي اليا زما يبرك علـى زوره



يعرف مقاسه مدام انـه يقاوسنـا



الارض بسباعها والجو بصقـوره



ندرسـه دامـه بيدخـل مدارسنـا



ندرسه لين يطلع درسه اسطـوره



لا يحسب انـا رقيقـات ملامسنـا



ارواحنا كلها في وسط شرشـوره



زفيرها بالغضـب لامـن تنفسنـا



حتى يعرف السعودي لا طغا جوره



مثـل جهنـم ليـا منـا تقابسنـا



يشوفها في حياته شوف وتـزوره



اليا تمترس وحنـا لـه تمترسنـا



راياتنا يا هل التوحيـد منصـوره



من زار جيـزان بيعيـن مدابسنـا



من زاد فيه الغرور نحطم غـروره



يبين فيه العمـاس ولا يعومسنـا



احكم وريح وحنا لك ياخـو نـوره



من دون حكمك ترانا نرخص انفسنا